Löggildingar

Umhverfisráðherra veitir löggildingu til að leggja fram uppdrætti vegna byggingarleyfis samkvæmt 48. og 49. gr. skipulags- og byggingarlaga nr. 73/1997, með síðari breytingum.

Umsóknareyðublöð til útprentunar fyrir hönnuði:

• Arkitektar, verkfræðingar, tæknifræðingar og byggingafræðingar. Útskrifaðir fyrir 1.1.98
• Innanhússarkitektar og landslagsarkitektar. Útskrifaðir fyrir 1.1.98
• Arkitektar. Útskrifaðir eftir 1.1.98
• Byggingafræðingar. Útskrifaðir eftir 1.1.98
• Innanhússarkitektar og landslagsarkitektar. Útskrifaðir eftir 1.1.98
• Tæknifræðingar. verkfræðingar og rafiðnfræðingar. Útskrifaðir eftir 1.1.98

Ennfremur veitir umhverfisráðherra iðnmeisturum löggildingu til að bera ábyrgð á einstökum verkþáttum við byggingaframkvæmdir samkvæmt 52. gr. skipulags- og byggingarlaga.

Umsóknareyðublöð til útprentunar fyrir meistara:

• Meistarar

Umsóknareyðublað fyrir slökkviliðsmenn:

• Slökkviliðsmenn

Löggilding umhverfisráðherra til handa iðnmeisturum

Með skipulags- og byggingarlögum nr. 73/1997, sem tóku gildi 1. janúar 1998 var kveðið á um að umhverfisráðherra gæfi út leyfi til handa iðnmeisturum til að bera ábyrgð á einstökum verkþáttum við byggingarframkvæmdir.

Algengar spurningar og svör:

I Hvað felst í löggildingu ráðherra?
II Hver eru skilyrði löggildingar?
III Hvað er staðbundin viðurkenning?
IVHver gefur út meistarabréf?

I Hvað felst í löggildingu ráðherra?
Iðnmeistari skal, samkvæmt 1. mgr. 52. gr. skipulags- og bygginarlaga, staðfesta ábyrgð sína fyrir byggingarfulltrúa áður en hann kemur til verksins. Iðnmeistarinn ber ábyrgð gagnvart byggingarstjóra og eiganda byggingarframkvæmda á að þeir verkþættir, sem hann tekur að sér að hafa umsjón með, séu unnir í samræmi við viðurkennda verkhætti, samþykkta uppdrætti og lög eða reglugerðir. Löggilding ráðherra gildir um allt land.

II Hver eru skilyrði löggildingar?
Skilyrði löggildingar eru, skv. 2. mgr. 52.. gr. skipulags- og byggingarlaga, að iðnmeistari hafi meistarabréf og hafi lokið prófi frá meistaraskóla eða hafi a.m.k. sambærilega menntun á hlutaðeigandi sviði enda sé hann starfandi iðnmeistari.

III Hvað er staðbundin viðurkenning?
Viðurkenning einstakra byggingarnefnda til handa iðnmeisturum til að bera ábyrgð á verkþáttum. Slíkar viðurkenningar voru veittar fram til þess er skipulags- og byggingarlög, nr. 73/1997 tóku gildi, 1. janúar 1998. Samkvæmt 5. tl. ákvæðis til bráðabirgða halda slíkar viðurkenningar gildi sínu eftir gildstöku laganna. Ekki er munur á eðli þeirra réttinda sem staðbundin viðurkenning veitir og löggildingu ráðherra. Eini munurinn er að staðbundin viðurkenning gildir aðeins í viðkomandi umdæmi. Unnt er að fá þær yfirfærðar í önnur byggingarnefndar umdæmi að uppfylltum skilyrðum 2. mgr. 37. gr. byggingarreglugerðar, nr. 441/1998 með síðari breytingum. Þar segir að iðnmeistari skuli þegar hann leitar nýrrar staðbundinnar viðurkenningar, leggja fram verkefnaskrá staðfesta af byggingarfulltrúa er sýni fram á að hann hafi að staðaldri haft umsjón með og borið ábyrgð á byggingarframkvæmdum í a.m.k. þrjú ár eftir viðurkenningu í viðkomandi byggingarnefndarumdæmi.

IV Hver gefur út meistarabréf?
Lögreglustjóri í því umdæmi sem umsækjandi um meistarabréf á lögheimili gefur út meistarabréf.

Við stjórn framkvæmda hvers mannvirkis skal vera byggingarstjóri skv. 51 gr skipulags- og byggingarlaga

I. Hverjir geta orðið byggingarstjórar?
Samkvæmt 51. gr. skipulags- og byggingarlaga geta eftirtaldir aðilar orðið byggingarstjórar:
Iðnmeistarar;
Húsasmíðameistarar, múrarameistarar, pípulagningarmeistarar, vélvirkjameistarar, rafvirkjameistarar og byggingariðnfræðingar sem hlotið hafa viðurkenningu skv. 52. gr. og tilskilið starfsleyfi.
Mannvirkjahönnuðir;
Arkitektar, byggingarverkfræðingar, byggingartæknifræðingar, byggingarfræðingar og aðrir verkfræðingar og tæknifræðingar með hliðstæða menntun á byggingarsviði.
Fyrirtæki;
Fyrirtæki og stofnanir þar sem starfar aðili sem uppfyllir skilyrði 1. eða 2. tölul. 51. gr., enda annist hann störf byggingarstjóra.

II. Hvert er hlutverk byggingarstjóra?
Byggingarstjóri er framkvæmdastjóri byggingarframkvæmda skv. 3. mgr 51. gr. skipulags- og byggingarlaga. Hann ræður iðnmeistara í upphafi verks með samþykki eiganda eða samþykkir ráðningu þeirra. Samsvarandi gildir um uppsögn iðnmeistara. Byggingarstjóri ber ábyrgð á því að byggt sé í samræmi við samþykkta uppdrætti, lög og reglugerðir. Hann skal hafa fullnægjandi ábyrgðartryggingu er gildi a.m.k. í fimm ár frá lokum þeirra framkvæmda sem hann stýrði. Að öðru leyti fer um umboð byggingarstjóra, verksvið hans og ábyrgð gagnvart eiganda byggingarframkvæmda eftir samningi þeirra á milli. Áður en byggingarframkvæmdir hefjast skal byggingarstjóri staðfesta ábyrgð sína fyrir byggingarfulltrúa. Byggingarstjóri gerir byggingarfulltrúa viðvart um lok úttektarskyldra verkþátta. Við lok framkvæmda skal byggingarstjóri staðfesta að byggt hafi verið í samræmi við samþykkta uppdrætti, lög og reglugerðir. Nánari reglur um byggingarstjóra eru í 31. gr. byggingarreglugerðar.

III. Þarf löggildingu til að gerast byggingarstjóri?
Ekki er veitt sérstök löggilding til að gerast byggingarstjóri. Hins vegar kemur fram í 2. mgr. 51. gr. skipulags- og byggingarlaga að skilyrði þess að iðnmeistarar geti orðið byggingarstjórar er að þeir hafi viðurkenningu skv. 52. gr. laganna og lýst er hér að ofan og tilskilið starfsleyfi.